Gweithredu cymdeithasol yn y byd ehangach

Mae'r cynllun gwaith hwn yn cefnogi dysgwyr i ddatblygu'r wybodaeth, y sgiliau a'r ymwybyddiaeth sydd eu hangen i fod yn ddinasyddion gweithredol a chyfrifol. Erbyn diwedd y cynllun gwaith, dylai dysgwyr fod â gwell dealltwriaeth o sut y gallant wneud gwahaniaeth cadarnhaol yn eu hysgol, eu cymuned leol a'r byd ehangach, yn ogystal â'r hawliau a'r cyfrifoldebau sy'n dod gyda bod yn ddinesydd gweithredol.
Wrth gwblhau'r cynllun gwaith, bydd dysgwyr yn archwilio gweithredu cymdeithasol, dinasyddiaeth fyd-eang, y Nodau Datblygu Cynaliadwy, a beth mae'n ei olygu i fod yn aelod cadarnhaol o gymuned ysgol. Byddant yn ystyried sut y gall eu gweithredoedd ddylanwadu ar eraill a chyfrannu at newid cadarnhaol, gan gymryd rhan mewn trafodaethau, gweithgareddau a chynllunio ymarferol.
Dyluniwyd y cynllun gwaith gan Ddinasyddion Ifanc ar gyfer dysgwyr yng Nghyfnod Allweddol 2 a'r bwriad yw ei gyflwyno fel rhaglen o wersi hyblyg, cysylltiedig. Anogir athrawon i ddewis a dethol o'r deunyddiau sydd ar gael i ddylunio'r gyfres o sesiynau sydd orau i'w grŵp.